Անկախության այս տարիներին մեր ամենամեծ կորուստը 2 միլիոն 300 հազար հայն է: Մենք այսօր պետք է ունենայինք 5 միլիոն բնակչություն, սակայն ունենք 2 միլիոն 700 հազար: Այս մասին այսօր լրագրողների հետ հանդիպման ժամանակ խոսելով անկախ Հայաստանի նվաճումների ու կորուստների մասին, ասաց «Սոցիոմետր» սոցիոլոգիական կենտրոնի տնօրեն Ահարոն Ադիբեկյանը:

Նրա խոսքով՝ անկախությունը նման է կուսության. Կամ կարելի է լավ գնով վաճառել այն, կամ փոխարինել ինչ-որ թանկարժեք բանով: «Մենք պետք է փորձենք ճիշտ օգտագործել մեր անկախությունը՝ կամ պետք է մտնենք Մաքսային միություն, կամ Եվրոպական միություն: Ամենաճիշտը կլինի պատպանել ՄՄ  հետ կապերը, քանի որ Եվրոպայում մեր արտադրանքը չեն գնի, սակայն դա չի նշանակում, որ մենք պետք է տեխնոլոգիական առումով հետամնաց երկիր դառնանք»,-ընդգծել է սոցիոլոգը, հավելելով, որ Հայաստանը պետք է արտադրի ոչ միայն ներքին սպառողների համար, այլեւ դուրս գա արտաքին շուկա:

Միաժամանակ սոցիոլոգի կարծիքով Հայաստանը սխալ օգտագործեց իր անկախությունը.

«Անկախանալով մենք կորցրեցինք հզոր տնտեսությունն ու այդ դեպքում պետք է գոնե պահպանեինք Ռուսաստանի հետ սերտ տնտեսական համագործակցությունը: Այնպես որ, կարծում եմ, Մաքսային միությանը միանալու որոշումն ամենաճիշտն էր անկախ Հայաստանի պատմության մեջ»,- ասաց Ահարոն Ադիբեկյանը:


http://hayeli.am/article/365349/